As persoas matutinas non deberían traballar de noite nin as vespertinas de día
Un estudo realizado na Universidad de Granada, en colaboración coa Universidade de Boloña, advirte da necesidade de axustar as preferencias circadianas de cada persoa –se é matutina, vespertina ou intermedia– aos seus horarios de traballo, xa que cando un traballador se somete a horarios que non encaixan coa súa preferencia circadiana pode ver afectada a súa capacidade de tomar decisións, debido a unha falta de control cognitivo que provoca impulsividade
Os ritmos circadianos son cambios físicos, mentais e condutuais que seguen un ciclo aproximado de 24 horas e que responden, principalmente, á luz e a escuridade no ambiente no que vive un organismo. Estes ritmos afectan o estado emocional e ao control cognitivo das persoas, que é a posibilidade de regular exitosamente e de modo deliberado a intensidade, as circunstancias provocadoras de emocións. Á súa vez, a toma de decisións dun suxeito está afectada por factores psicolóxicos como o estado emocional ou o control cognitivo.
Investigadores da Universidad de Granada, pertencentes ao Centro de Investigación ‘Mente, Cerebro y Comportamento’ ( CIMCYC), xunto cos da Universidade de Boloña (Italia), avaliaron a preferencia circadiana –é dicir, se os participantes eran matutinos, vespertinos ou intermedios– para coñecer a influencia da hora do día e a preferencia circadiana na toma de decisións interpersoais medida mediante un xogo económico que os participantes realizaban nun computador.
No estudo participaron 64 estudantes italianos de ambos os sexos, pertencentes á Universidade de Boloña, dos que 32 eran matutinos e 32 vespertinos. A todos eles expúxoselles un xogo que consistía en aceptar ou rexeitar ofertas propostas por un compañeiro virtual. O racional neste xogo sería aceptar todas as ofertas, xa que aceptar implica que cada un dos xogadores queda coa cantidade proposta, mentres que rexeitar implicaría que ningún deles levaría nada.
Toma de decisións
Unha vez seleccionados os participantes, en función da súa preferencia circadiana extrema (matutino e vespertino), foron citados en dous momentos temporais (pola mañá e pola tarde) para que realizasen unha proba de control cognitivo e a proba principal de toma de decisións. Ademais, tomáronse en conta marcadores corporais como a temperatura para verificar que realmente se atopaban nos seus momentos óptimo-non óptimo do día. Dese xeito, os científicos comprobaron como estes se comportaban na súa hora óptima do día e na súa hora non óptima.
Os matutinos investiron máis tempo en tomar as decisións que reflectían máis incerteza
Os resultados demostraron que os participantes mostraron unha desviación da racionalidade, rexeitando as ofertas inxustas. Ademais, os matutinos investiron máis tempo en tomar as decisións que reflectían máis incerteza (as que non eran claramente xusta ou inxustas). Á luz dos resultados do seu traballo, dous os seus autores, os investigadores da UGR Ángel Correa Torres e Noelia Ruíz Herrera, afirman que, cando somos sometidos a horarios que alteran o noso ritmo circadiano, poderiamos tomar decisións de maneira máis impulsiva, o que podería afectar á calidade das nosas accións e por suposto, actuar en contra do noso propio beneficio. Ademais, sosteñen que existe unha diferenza entre estilos de toma de decisións entre matutinos e vespertinos, xa que os matutinos invisten máis tempo en meditar as decisións.
Os autores advirten, por tanto, da necesidade de coñecer a preferencia circadiana para axustar aos traballadores aos seus horarios de traballo. Deste modo as empresas manterían unha vantaxe xa que se poderían adaptar de maneira máis adecuada os horarios de traballo para aproveitar os picos de rendemento óptimo de cada traballador.
Referencia bibliográfica:
Angel Correa, Noelia Ruiz-Herrera, Maria Ruz, Lorenzo Tonetti, Monica Martoni, Marco Fabbri and Vincenzo Natale. ” Economic decision- making in morning/ evening- type people as a function of estafe of day”. CHRONOBIOLOGY INTERNATIONAL http://dx.doi.org/10.1080/07420528.2016.1246455
Fonte: Universidade de Granada
Imaxe: Os investigadores de la UGR Noelia Ruiz e Ángel Correa, autores do estudo / UGR
